اسلام 24/7 : یمنی مسلح افواج نے اعلان کیا ہے کہ انہوں نے ملک کے شمال مشرقی صوبہ مأرب میں سعودی حمایت یافتہ فورسز کے ایک اجتماع کو میزائل حملے کا نشانہ بنایا ہے۔ مأرب کی مقامی انتظامیہ نے بھی تصدیق کی ہے کہ اتوار کو شہر کی جانب آٹھ بیلسٹک میزائل داغے گئے۔
ایرانی خبر رساں ادارے ‘مہر’ کے مطابق یمنی فوج نے اتوار کی رات بتایا کہ کارروائی میں مأرب میں سعودی فورسز کے اجتماع کی جگہ کو نشانہ بنایا گیا۔ یمنی ذرائع کے مطابق اسی دوران یمنی فضائی دفاع نے صوبہ صعدہ کی فضا میں سعودی جنگی طیاروں کا مقابلہ کیا اور انہیں پسپا ہونے پر مجبور کر دیا۔
مزید پڑھیں : 24 گھنٹوں میں دوسرا وار: یمنی فوج کا عدن کے بدر کیمپ میں سعودی افواج کے کمانڈ ہیڈکوارٹر اور اسلحہ ڈپو پر حملہ
ترک خبر رساں ادارے ‘اناطولیہ’ کے مطابق مأرب گورنریٹ نے ‘فیس بک’ پر جاری بیان میں کہا کہ انصاراللہ نے اتوار کو شہر کی جانب آٹھ بیلسٹک میزائل فائر کیے۔ مأرب بین الاقوامی سطح پر تسلیم شدہ اور سعودی حمایت یافتہ حکومت کے کنٹرول میں ہے اور وہاں بڑی تعداد میں بے گھر افراد بھی مقیم ہیں۔ کسی بھی فریق نے اب تک حملے میں جانی نقصان کی تفصیل جاری نہیں کی۔
یمنی ٹی وی ‘المسیرہ’ کے مطابق یمنی فوج کے میڈیا ونگ نے اتوار کو ایک نئی ویڈیو بھی جاری کی جس میں مقامی طور پر تیار کردہ ‘رجوم’ ڈرونز کو مختلف محاذوں پر سعودی حمایت یافتہ فورسز کو نشانہ بناتے دکھایا گیا ہے۔ ویڈیو میں ڈرونز فوجی گاڑیوں اور اہلکاروں کے اجتماعات پر حملہ کرتے نظر آتے ہیں، جبکہ ‘المسیرہ’ کے مطابق ایک حملے میں کئی ڈرونز کے ذریعے سعودی حمایت یافتہ جنگجوؤں کا پورا قافلہ تباہ کر دیا گیا۔
واضح رہے کہ ‘رجوم’ ایک حملہ آور ڈرون ہے جو دھماکہ خیز مواد لے جا کر میدان جنگ میں براہ راست اہداف کو نشانہ بنانے کے لیے تیار کیا گیا ہے۔ یمنی فوج اس سے قبل عدن کے بدر کیمپ میں سعودی افواج کے کمانڈ ہیڈکوارٹر اور اسلحہ ڈپو پر حملے کا بھی اعلان کر چکی ہے۔