اسلام 24/7 : یمنی مسلح افواج نے جنوبی شہر عدن میں بدر کیمپ کے اندر سعودی افواج کے کمانڈ ہیڈکوارٹر اور اسلحہ کے ڈپوؤں کو نشانہ بنایا ہے۔
یمنی ٹی وی ‘المسیرہ’ کے مطابق یمن کی سرکاری خبر رساں ایجنسی ‘سبا’ سے بات کرتے ہوئے ایک فوجی ذریعے نے کہا کہ اس کارروائی میں بدر کیمپ میں موجود سعودی افواج کے کمانڈ ہیڈکوارٹر اور اسلحہ کے گوداموں کو ہدف بنایا گیا۔
مزید پڑھیں : یمنی فوج کا عدن میں قصر معاشیق پر میزائل حملہ، سعودی فوجی تعیناتی جہاں بھی ہو جائز ہدف ہے، یحییٰ سریع
‘المسیرہ’ کے مطابق یہ کارروائی عدن میں سعودی فوجی کارروائیوں کے ہیڈکوارٹر پر ہونے والے ایک اور یمنی حملے کے 24 گھنٹے سے بھی کم وقت بعد کی گئی۔ ‘المسیرہ’ نے کہا کہ آپریشن روم اور اسلحہ ڈپوؤں پر حملہ یمنی مسلح افواج کی انٹیلی جنس صلاحیت اور سعودی حمایت یافتہ افواج کے زیر کنٹرول علاقوں کے اندر گہرائی میں اہم اہداف کو نشانہ بنانے کی صلاحیت کو ظاہر کرتا ہے۔
اسی دوران ‘المسیرہ’ کے مطابق سعودی ذرائع ابلاغ نے کہا کہ جازان میں خطرے کے پیش نظر الرٹ جاری کیا گیا۔
واضح رہے کہ جمعرات کو یمنی مسلح افواج کے ترجمان بریگیڈیئر جنرل یحییٰ سریع نے عدن کے قصر معاشیق پر میزائل حملے کا اعلان کرتے ہوئے کہا تھا کہ یہ کارروائی ’’سعودی فوجی تعیناتیوں کو جہاں بھی ہوں نشانہ بنانے‘‘ کی اعلان شدہ مساوات کے تحت کی گئی، اور سعودی دشمن کی ہر فوجی موجودگی یمنی افواج کا جائز ہدف ہے۔ یمنی افواج کا کہنا ہے کہ ان کی کارروائیاں دفاعی ہیں اور سعودی جارحیت اور محاصرہ ختم ہونے تک جاری رہیں گی۔