اسلام 24/7 : نجف اشرف میں قائم ادارے ‘شہر علم’ نے اپنا پہلا سال مکمل ہونے پر خصوصی اجتماع منعقد کیا اور سالانہ کارکردگی رپورٹ جاری کی، جس کے مطابق 46 شہروں کے تقریباً ایک ہزار طلبہ و طالبات نے اس کے آن لائن دینی کورسز میں حصہ لیا۔
اہل بیت (ع) نیوز ایجنسی ‘ابنا’ کے مطابق اجتماع میں ادارے کے سرپرست اور آیت اللہ العظمیٰ سید علی سیستانی کے نمائندے حجۃ الاسلام والمسلمین مولانا شیخ جعفر علی یعسوبی نے شرکت کی اور شرکا کو رہنمائی فراہم کی۔ ان کی رہنمائی میں آئندہ سال کے منصوبوں پر بھی غور کیا گیا۔
مزید پڑھیں : عالمی اتحاد کے انخلا کے بعد داعش کی نگرانی کے لیے خصوصی ادارہ بنایا جائے، عمار الحکیم
رپورٹ کے مطابق ادارے نے پہلے سال واٹس ایپ کے ذریعے آٹھ آن لائن دینی اور تعلیمی کورسز کرائے، جن میں پاکستان اور دیگر علاقوں سے طلبہ شریک ہوئے۔ ان کورسز میں فقہ اور عملی احکام، عقائد، روزے کے احکام، زکات فطرہ، تجوید، دینی شبہات کے جوابات، غدیر کی اہمیت اور واقعات کربلا جیسے موضوعات شامل تھے۔ امتحانات میں شریک تقریباً 84 فیصد طلبہ نے 100 میں سے 70 یا زیادہ نمبر حاصل کیے۔
ادارے کے مطابق گزشتہ 90 دنوں میں اس کے سوشل میڈیا مواد کو تقریباً 30 لاکھ مرتبہ دیکھا گیا۔ شعبہ ترجمہ و اشاعت نے غدیر سے متعلق سوالات پر ایک کتاب کی تقریباً 200 اور نماز شب، نماز غفیلہ اور نماز وحشت سے متعلق کتاب کی 2,000 کاپیاں شائع کر کے تقسیم کیں۔
اجتماع کے شرکا نے اہل بیت علیہم السلام کی تعلیمات کو اخلاص، نظم و ضبط اور باہمی تعاون کے ساتھ فروغ دینے کے عزم کا اعادہ کیا۔ واضح رہے کہ ادارے کے مطابق اس کے بیشتر شعبوں میں کام کرنے والے افراد کسی معاوضے کے بغیر رضاکارانہ خدمات انجام دیتے ہیں۔