اسلام 24/7 : ایران بھر میں بدھ کو 13 آبان یعنی عالمی استکبار کے خلاف جدوجہد کے قومی دن کے موقع پر 900 سے زائد مقامات پر عوامی ریلیاں نکالی گئیں۔ ایرانی خبر رساں ایجنسی ‘مہر’ کے مطابق اس سال کا نعرہ ’’شہداء سے عہد، عالمی استکبار کے خلاف جدوجہد‘‘ تھا۔
تہران میں مارچ میدان فلسطین سے شروع ہو کر خیابان طالقانی سے گزرتا ہوا سابق امریکی سفارت خانے ‘لانہ جاسوسی’ تک پہنچا۔ قرآنی خبر رساں ایجنسی ‘ایکنا’ کے مطابق شرکاء نے امریکہ اور اسرائیل کے خلاف نعرے لگائے اور شہداء کی تصاویر اٹھا رکھی تھیں۔
مزید پڑھیں : بدعنوانی کے خلاف فیصلہ کن جنگ کریں، امریکی و اسرائیلی جارحیت کے نقصانات کا ہرجانہ حاصل کیا جائے، رہبر انقلاب
‘ایکنا’ کے مطابق تقریب کے مرکزی مقرر تہران کے میئر علی رضا زاکانی تھے، جنہوں نے کہا کہ ایرانی قوم نے آٹھ ماہ کی جنگ میں ثابت کر دیا ہے کہ امریکی دباؤ اور جارحیت اسے جھکا نہیں سکتی۔ تقریبات کے مرکزی دفتر کے سربراہ مصطفیٰ رستمی نے عوام کی وسیع شرکت کو قومی اتحاد کا مظہر قرار دیا۔
‘مہر’ کے مطابق عدلیہ کے سربراہ حجت الاسلام غلام حسین محسنی اژہ ای نے مشہد میں حرم امام رضا علیہ السلام میں کہا کہ استکبار کے خلاف جدوجہد ایک مستقل فریضہ ہے۔ ریلیوں کے اختتام پر جاری قرارداد میں مزاحمتی محاذ کی حمایت کا اعادہ کیا گیا۔
واضح رہے کہ 13 آبان 1358 ہجری شمسی کو ایرانی طلبہ نے تہران میں امریکی سفارت خانے پر قبضہ کیا تھا اور ایران میں یہ دن ہر سال استکبار کے خلاف قومی دن کے طور پر منایا جاتا ہے۔