اسلام 24/7 : سپاہ پاسداران انقلاب اسلامی کی بحریہ نے اعلان کیا ہے کہ آبنائے ہرمز کے غیر مجاز جنوبی راستے سے گزرنے کی کوشش کرنے والے دو سپر ٹینکر بحری بارودی سرنگوں سے ٹکرا کر مکمل طور پر ناکارہ ہو گئے، جس کے بعد ان کا عملہ جہاز چھوڑ کر فرار ہو گیا۔ ایرانی خبر رساں ایجنسی ‘مہر’ کے مطابق یہ واقعہ جمعہ کی صبح پیش آیا۔
سپاہ بحریہ کے شعبہ تعلقات عامہ کے بیان کے مطابق بارودی سرنگوں سے ٹکرانے کے بعد دونوں ٹینکروں کے انجن رومز میں شدید دھماکے ہوئے اور آگ بھڑک اٹھی، جس سے جہاز اپنی جگہ رک گئے۔ بیان کے مطابق دونوں ٹینکروں پر مجموعی طور پر 45 لاکھ بیرل سے زیادہ خام تیل لدا ہوا تھا۔
مزید پڑھیں : آبنائے ہرمز سے غیر مجاز جہازوں کی آمدورفت مکمل بند، امریکی 600 سے 700 کلومیٹر دور جا چکے ہیں، سپاہ پاسداران
ایرانی ٹی وی ‘پریس ٹی وی’ کے مطابق سپاہ پاسداران بارہا خبردار کر چکی ہے کہ آبنائے میں بارودی سرنگیں بچھی ہیں اور امریکی فوجی حفاظت پر بھروسہ کر کے یا ٹریکنگ نظام بند کر کے جنوبی راستہ اختیار کرنے کا نتیجہ تباہی ہوگا۔
ادھر ‘مہر’ کے مطابق سپاہ پاسداران کے ترجمان بریگیڈیئر جنرل حسین محبی نے جمعہ کی رات ‘ایکس’ پر جلتے ہوئے آئل ٹینکر کی ایک تصویر شائع کی، جس پر برینٹ خام تیل کی قیمت 116 سے بڑھ کر 117 ڈالر فی بیرل ہونے کا ذکر تھا۔
واضح رہے کہ ‘مہر’ کے مطابق امریکا ایران کی بحری ناکہ بندی جاری رکھے ہوئے ہے، جبکہ عالمی منڈی میں تیل کی قیمتیں مسلسل بڑھ رہی ہیں۔