اسلام 24/7 : پاکستان اور سری لنکا کی کرکٹ ٹیمیں تین میچوں کی ٹی 20 سیریز کے دوسرے میچ میں آج اتوار کو راولپنڈی کرکٹ اسٹیڈیم میں مدمقابل ہوں گی۔ میچ پاکستانی وقت کے مطابق شام 6 بجے شروع ہوگا، جس میں قومی ٹیم کامیابی حاصل کر کے سیریز میں ناقابل شکست 0-2 کی برتری حاصل کرنے کی کوشش کرے گی۔
جمعہ کو کھیلے گئے پہلے میچ میں پاکستان نے سری لنکا کو 4 وکٹوں سے شکست دی تھی۔ سری لنکا نے پہلے بیٹنگ کرتے ہوئے لاہیرو اُدارا کی 55 گیندوں پر 91 رنز کی اننگز کی بدولت 8 وکٹوں پر 182 رنز بنائے تھے، جبکہ پاکستان نے ہدف 19ویں اوور میں 6 وکٹوں پر 187 رنز بنا کر حاصل کر لیا تھا۔ کپتان صاحبزادہ فرحان نے 53 گیندوں پر 89 رنز بنائے اور میچ کے بہترین کھلاڑی قرار پائے، جبکہ معاذ صداقت نے اپنی پہلی انٹرنیشنل ٹی 20 نصف سنچری اسکور کی۔ نسیم شاہ نے 36 رنز دے کر 3 وکٹیں حاصل کی تھیں۔
مزید پڑھیں : پہلا ٹی ٹوئنٹی : پاکستان نے سری لنکا کو چھ وکٹوں سے شکست دے دی
روزنامہ ‘ڈان’ کے مطابق یہ سیریز صاحبزادہ فرحان کی بطور کپتان پہلی ہوم سیریز ہے اور ٹیم انتظامیہ کے سامنے یہ سوال ہے کہ فاتح الیون برقرار رکھی جائے یا بینچ پر موجود کھلاڑیوں کو موقع دیا جائے۔ کپتان کا کہنا تھا: ’’ہمارے پاس عرفات منہاس، عبدالصمد اور سفیان مقیم جیسے متبادل کھلاڑی ہیں، اس لیے ہماری بیک اپ طاقت بہت مضبوط ہے۔‘‘ ان کے مطابق ٹیم کا کمبی نیشن طے شدہ نہیں اور آئندہ میچوں میں تبدیلیاں کی جا سکتی ہیں۔
معاذ صداقت نے پہلے میچ کے بعد کہا تھا کہ وہ اپنے فطری انداز میں کھیلتے رہیں گے اور پاکستان کے لیے کسی بھی نمبر پر بیٹنگ کے لیے تیار ہیں۔ کپتان صاحبزادہ فرحان نے بھی کہا کہ کپتان ہوتے ہوئے دباؤ ضرور ہوتا ہے، تاہم وہ موجودہ ٹیم سے بہت مطمئن ہیں۔
واضح رہے کہ قومی ٹی 20 ٹیم تعمیر نو کے مرحلے سے گزر رہی ہے اور بابر اعظم، محمد رضوان اور شاہین شاہ آفریدی اس وقت اسکواڈ کا حصہ نہیں ہیں۔ صاحبزادہ فرحان اس سے قبل ایشین گیمز میں ٹیم کی قیادت کر چکے ہیں، جہاں پاکستان نے چاندی کا تمغہ حاصل کیا تھا۔