اسلام 24/7 : اسلامی کیلنڈر کا چوتھا مہینہ ربیع الثانی اختتام کو پہنچ رہا ہے اور جمادی الاول 1448 ہجری کا آغاز اسی ہفتے ہو رہا ہے۔ سعودی عرب کے سرکاری ‘ام القریٰ’ کیلنڈر کے مطابق آج اتوار 11 اکتوبر کو ربیع الثانی کی 30 تاریخ ہے اور جمادی الاول کا آغاز کل پیر 12 اکتوبر سے ہوگا، جبکہ یہ مہینہ 30 دن کا ہوگا۔
مصری ذرائع ابلاغ کے مطابق مصر کا ‘دارالافتاء’ آج شام، جو وہاں 29 ربیع الثانی ہے، ملک بھر میں قائم شرعی کمیٹیوں کے ذریعے جمادی الاول کا چاند دیکھنے کا اہتمام کرے گا اور نتیجے کا اعلان اپنے سرکاری صفحے پر کرے گا۔ عرب ویب سائٹ ‘موجز الانباء’ کے فلکیاتی اعداد و شمار کے مطابق آج غروب آفتاب کے بعد نیا چاند مکہ مکرمہ کے افق پر تقریباً 20 منٹ اور قاہرہ میں تقریباً 13 منٹ تک موجود رہے گا۔
مزید پڑھیں : ماہِ رجب؛ دعا، عمل اور تربیت نفس کے ذریعے ظہورِ امام زمانہؑ کی تیاری کا بہترین موقع
پاکستان میں محکمہ موسمیات کی جانب سے جاری کردہ 2026 کے رویت کیلنڈر کے مطابق جمادی الاول کا چاند 12 اکتوبر کو نظر آنے کا امکان ہے، جس کے بعد ملک میں مہینے کا آغاز 13 اکتوبر سے متوقع ہے، تاہم حتمی اعلان مرکزی رویت ہلال کمیٹی کرے گی۔
جمادی الاول ہجری سال کا پانچواں مہینہ ہے اور اسلامی تاریخ میں کئی اہم واقعات اس سے منسوب ہیں۔ اسی مہینے میں 8 ہجری کو ‘غزوۂ موتہ’ پیش آیا، جس میں تقریباً تین ہزار مسلمانوں کا سامنا رومی لشکر سے ہوا اور اسلامی لشکر کے تینوں سپہ سالار حضرت زید بن حارثہؓ، حضرت جعفر بن ابی طالبؓ اور حضرت عبداللہ بن رواحہؓ شہید ہوئے۔ مشہور روایت کے مطابق 5 جمادی الاول کو حضرت زینب بنت علیؑ کی ولادت ہوئی، اور ایران میں یہ دن ‘یوم نرس’ کے طور پر منایا جاتا ہے۔
واضح رہے کہ ہجری کیلنڈر چاند کی گردش پر مبنی ہے، اس لیے مختلف ممالک میں رویت کی بنیاد پر مہینوں کے آغاز میں ایک دن کا فرق آ جاتا ہے۔ ہجری تقویم کا باضابطہ آغاز خلیفۂ دوم حضرت عمر بن خطابؓ کے دور میں ہوا اور اس کی بنیاد نبی اکرم ﷺ کی مکہ سے مدینہ ہجرت کو بنایا گیا۔