اسلام 24/7 : اسرائیلی فوج نے جنوبی لبنان پر حملوں میں شدت پیدا کرتے ہوئے ہفتے اور اتوار کی درمیانی شب سے متعدد قصبوں پر فضائی حملے، گولہ باری اور فائرنگ کی ہے۔ لبنانی ٹی وی چینل ‘المنار’ کے نامہ نگاروں کے مطابق اسرائیلی جنگی طیاروں نے ضلع صور کے قصبے المنصوری پر دو فضائی حملے کیے، جبکہ طلوسہ اور کفرتبنیت کو بھی الگ الگ حملوں میں نشانہ بنایا گیا۔
‘المنار’ کے مطابق اسرائیلی توپ خانے نے وادی السلوقی، وادی الحجیر اور وادی زبقین کے علاوہ شقرا، حولا، القنطرہ اور المنصوری کے اطراف اور میفدون کی سمت زوطر الشرقیہ کے مضافات پر گولہ باری کی، جبکہ بیوت السیاد میں قابض فوج نے دو مرتبہ دھماکے کیے۔ ایرانی خبر رساں ایجنسی ‘مہر’ نے المنصوری پر فضائی حملوں کی ویڈیو جاری کرتے ہوئے انہیں جنگ بندی کی کھلی خلاف ورزی قرار دیا۔
مزید پڑھیں : حزب اللہ لبنان میں صہیونی فوج کی راہ میں مضبوط رکاوٹ
اسرائیلی فورسز نے برعشیت، زوطر الشرقیہ، بیت یاحون اور حداثا کی جانب، اور وادی حلتا اور کفرشوبا کے مضافات کے درمیانی علاقے میں مشین گنوں سے فائرنگ کی۔ ‘المنار’ کے مطابق کفرشوبا کے قریب فائرنگ ایسے وقت میں کی گئی جب مقامی لوگ زیتون کی فصل اتار رہے تھے، جس سے کسانوں کی جانیں خطرے میں پڑ گئیں۔ بیت یاحون، کفرتبنیت اور حداثا میں اسرائیلی فوجی گاڑیوں کی نقل و حرکت بھی دیکھی گئی۔
‘المنار’ کے نامہ نگار کے مطابق اتوار کی دوپہر اسرائیلی جنگی طیاروں نے دارالحکومت بیروت اور کوہ لبنان کی فضاؤں میں انتہائی نچلی پروازیں کیں۔ ابتدائی رپورٹس میں ان حملوں سے ہونے والے جانی نقصان کی تفصیلات سامنے نہیں آئیں۔
واضح رہے کہ جنگ بندی کے باوجود اسرائیلی فوج جنوبی لبنان کے بعض علاقوں میں موجود ہے اور تقریباً روزانہ فضائی حملوں، گولہ باری، فائرنگ اور مکانات دھماکوں سے اڑانے کی کارروائیاں جاری رکھے ہوئے ہے۔ لبنانی حکام ان کارروائیوں کو ملکی خودمختاری کی خلاف ورزی قرار دیتے ہیں، جبکہ اسرائیل عموماً حزب اللہ کے ٹھکانوں کو نشانہ بنانے کا دعویٰ کرتا ہے۔