اسلام 24/7 : اسرائیلی قابض فوج نے ہفتے کو جنوبی لبنان کے مختلف علاقوں پر حملے جاری رکھے۔ لبنانی ٹی وی ‘المنار’ نے انہیں لبنان کی خودمختاری اور قرارداد 1701 کی خلاف ورزی قرار دیا۔ چینل کے نامہ نگار کے مطابق قابض فوج نے جنوبی قصبے طیبہ میں دھماکوں کے ذریعے انہدامی کارروائی کی، جس کے بعد علاقے سے دھواں اٹھتا دیکھا گیا۔
نامہ نگار کے مطابق خیام میں بھی ایک بڑا انہدامی دھماکہ کیا گیا، جبکہ بلڈوزروں کی مدد سے ایک اسرائیلی دستے نے شبعا کے علاقے سدانہ سے وادی کی طرف نئی سڑک بنانا شروع کر دی ہے۔ یاطر میں ایک چھوٹے اسرائیلی حملہ آور ڈرون نے کسانوں کے قریب صوتی بم گرایا، تاہم کوئی جانی نقصان نہیں ہوا۔
مزید پڑھیں : جنوبی لبنان: کفرشوبا میں زیتون چننے والے 2 شہری اغوا کے بعد رہا، مرکاوا ٹینک رہائشی محلوں کے قریب پہنچ گئے
‘المنار’ کے مطابق ہفتے کی صبح اسرائیلی توپخانے نے خیام، زوطر الشرقیہ کے مضافات، میفدون، المنصوری اور قنطرہ سے وادی السلوقی کی جانب کے علاقوں کو نشانہ بنایا۔ خیام، کفرتبنیت، حداثا اور بیت یاحون کی جانب مشین گنوں سے فائرنگ اور وادی زبقین پر گولہ باری کی گئی۔
چینل کے مطابق یہ حملے جمعہ کی شام حاریص اور حداثا کے درمیانی علاقے، دریائے زوطر کے کنارے اور برعشیت کے مضافات پر اسرائیلی گولہ باری کے بعد کیے گئے۔
واضح رہے کہ جنوبی لبنان کے سرحدی دیہات میں اسرائیلی دستوں کی دراندازی، گھروں کی مسماری اور زرعی زمینوں پر حملے روزانہ کا معمول بن چکے ہیں، جن سے زیتون کے موسم میں مقامی کسان شدید متاثر ہو رہے ہیں۔