اسلام 24/7 : لاہور میں نیشنل سائبر کرائم انویسٹی گیشن ایجنسی (این سی سی آئی اے) نے سائبر کرائمز کے خلاف بڑی اور کامیاب کارروائی کرتے ہوئے ہنی ٹریپ اور بلیک میلنگ میں ملوث ایک منظم نیٹ ورک کا پردہ چاک کر دیا ہے۔ شہر کے مختلف علاقوں میں دو کال سینٹرز پر چھاپے مار کر 17 خواتین سمیت 26 افراد کو حراست میں لے لیا گیا ہے۔
این سی سی آئی اے حکام کے مطابق، گرفتار ملزمان مبینہ طور پر سوشل میڈیا پلیٹ فارمز پر شہریوں کو دوستی اور محبت کا جھانسہ دے کر اپنے جال میں پھنساتے تھے۔ ملزمان شہریوں کو ویڈیو کالز پر آمادہ کر کے ان کی ریکارڈنگز کرتے اور پھر ان ویڈیوز کی بنیاد پر انہیں بلیک میل کر کے بھاری مالی فوائد حاصل کرتے تھے۔
مزید پڑھیں : اسرائیلی بحری اڈے سے جدید اسلحے کی چوری: فوجی اہلکار کے خلاف فرد جرم عائد
ان چھاپہ مار کارروائیوں کے دوران ملزمان کے قبضے سے 35 موبائل فونز اور 2 لیپ ٹاپ برآمد کر کے قبضے میں لے لیے گئے ہیں، جنہیں مزید تحقیقات اور فرانزک کے لیے بھجوا دیا گیا ہے۔ اس کے علاوہ، ایجنسی کی جانب سے علامہ اقبال ٹاؤن کے علاقے میں ایک اور اہم کارروائی کی گئی، جہاں برطانوی شہریوں کو آن لائن فراڈ کا نشانہ بنانے والے گروہ کے 9 ارکان کو گرفتار کیا گیا۔
سائبر کرائم حکام نے اس موقع پر عوام کو سخت انتباہ جاری کیا ہے کہ وہ سوشل میڈیا پر انتہائی محتاط رہیں۔ نامعلوم اور اجنبی افراد کی جانب سے دوستی کی پیشکش قبول کرنے، نجی تصاویر شیئر کرنے اور ویڈیو کالز کرنے سے سختی سے گریز کیا جائے تاکہ بلیک میلنگ اور مالی فراڈ جیسے جرائم سے محفوظ رہا جا سکے۔