اسلام 24/7 : اسرائیلی فوج میں ڈسپلن اور سکیورٹی کی ابتر صورتحال کا ایک اور واقعہ سامنے آیا ہے، جہاں اسرائیلی فوجی استغاثہ نے رافائل شیمش نامی ایک اہلکار کے خلاف باقاعدہ فرد جرم دائر کر دی ہے۔ اس اہلکار پر مقبوضہ علاقے عتلیت میں واقع حساس بحری یونٹ ‘شایتت 13’ کے اڈے کے سکیورٹی شعبے سے جدید اسلحہ چوری کرنے، اسے غیر قانونی طور پر فروخت کرنے اور منشیات استعمال کرنے کے سنگین الزامات عائد کیے گئے ہیں۔
رپورٹ کے مطابق، شیمش نے ستمبر 2026 میں اس حساس فوجی اڈے پر پہنچ کر وہاں سے تین جدید ایم 4 (M4) رائفلیں، ان کے میگزین اور متعلقہ گولہ بارود چوری کیا۔ واضح رہے کہ ایم 4 رائفل دراصل ایم 16 کا ہی ایک جدید اور زیادہ خطرناک ماڈل مانا جاتا ہے۔
مزید پڑھیں : ناوی پلے کے لیے نوبل انعام کا انتخاب عالمی جرائم کے احتساب کی علامت ہے، حماس
اسرائیلی فوجی استغاثہ نے عدالت سے استدعا کی تھی کہ مقدمے کی حتمی عدالتی کارروائی مکمل ہونے تک ملزم کو سلاخوں کے پیچھے رکھا جائے۔ اس درخواست پر کارروائی کرتے ہوئے فوجی عدالت نے اہلکار کی حراست میں 21 اکتوبر 2026 تک توسیع کر دی ہے۔
واضح رہے کہ اسرائیلی فوجی اڈوں سے اسلحے اور گولہ بارود کی چوری اور بلیک مارکیٹ میں ان کی فروخت کا یہ کوئی پہلا واقعہ نہیں ہے۔ حالیہ کچھ عرصے کے دوران ایسے واقعات تسلسل کے ساتھ منظرِ عام پر آئے ہیں، اور دفاعی تجزیہ کاروں کے مطابق حساس فوجی سازوسامان کی چوری اسرائیلی فوجی اہلکاروں کے درمیان اب ایک تشویشناک حد تک معمول بنتی جا رہی ہے۔