اسلام 24/7 : جنوبی غزہ کے شہر خان یونس کے مغرب میں المواصی کے علاقے میں یونیورسٹی کالج کے داخلی راستے کے قریب اسرائیلی ڈرون حملے میں 3 فلسطینی شہید اور 11 زخمی ہو گئے ہیں۔ فلسطینی خبر رساں ایجنسی ‘وفا’ کے مطابق یہ حملہ منگل کو کیا گیا۔
‘وفا’ کے مطابق 39 سالہ عماد عمر احمد راضی پیر کو خان یونس کے شمال مغرب میں جاپانی محلے پر اسرائیلی حملے میں لگنے والے زخموں کی تاب نہ لاتے ہوئے شہید ہو گئے۔ ‘فلسطین انفارمیشن سینٹر’ کے مطابق وسطی غزہ میں ‘زرد لکیر’ کے مشرق میں موجود اسرائیلی فوجی گاڑیوں نے پناہ گزین کیمپوں کی طرف فائرنگ اور گولہ باری کی۔
مزید پڑھیں : غزہ میں اسلامی یونیورسٹی کے احاطے میں طلبہ پر اسرائیلی ڈرون حملہ، متعدد زخمی؛ خان یونس میں ایک فلسطینی شہید
لبنانی ٹی وی ‘المنار’ کے مطابق غزہ کی وزارت صحت نے بدھ کو بتایا کہ گزشتہ 24 گھنٹوں میں مزید 3 فلسطینی شہید ہوئے۔ ‘وفا’ کے مطابق وزارت نے کہا کہ جنگ بندی کے آغاز سے اب تک ملبے سے 847 لاشیں نکالی جا چکی ہیں۔
‘وفا’ کے مطابق غزہ کی وزارت صحت نے کہا کہ 7 اکتوبر 2023 سے اب تک شہداء کی تعداد 74,615 اور زخمیوں کی تعداد 1,75,899 ہو چکی ہے، جبکہ جنگ بندی کے بعد سے 1,599 فلسطینی شہید اور 5,774 زخمی ہوئے ہیں۔
واضح رہے کہ اکتوبر 2025 میں امریکی سرپرستی میں طے پانے والی جنگ بندی کے باوجود غزہ پر اسرائیلی حملے روزانہ کی بنیاد پر جاری ہیں۔