فلسطینی تحریک جہاد اسلامی کے ترجمان محمد الحاج موسیٰ نے کہا ہے کہ شہید قائد حضرت آیت اللہ سید علی خامنہ ای کا خون فلسطینی مزاحمت کے مجاہدین کے خون کے ساتھ ایک ہی معرکے میں مل گیا ہے۔
انہوں نے کہا کہ یہ عظیم شہادت مزاحمتی محاذ کے رہنماؤں اور فلسطینی مجاہدین کے خون کو ایک دوسرے سے جوڑتی ہے اور مشترکہ دشمن کے مقابلے میں جدوجہد اور مشترکہ تقدیر کی علامت ہے۔
یہ بھی پڑھیں : ایرانی فوج کا سخت انتباہ: دشمن کی غلطی پر کچلنے والا جواب دیا جائے گا
ترجمان نے کہا کہ مرحوم رہبر فلسطینی عوام کی حمایت کے مضبوط ستون تھے۔ گزشتہ کئی دہائیوں میں مزاحمتی قوتوں کو ملنے والی عسکری، لاجسٹک اور سیاسی حمایت ان کے براہ راست فیصلوں اور آزادی کی جدوجہد سے غیر متزلزل وابستگی کا نتیجہ تھی۔
ان کے بقول فلسطین کی مسلسل حمایت امت مسلمہ اور عرب دنیا کے اتحاد کی بنیاد ہے۔
محمد الحاج موسیٰ نے مزید کہا کہ ایران نے اپنی خودمختاری، قومی وقار اور امت اسلامی کے اصولوں کا دفاع کیا۔ محور مزاحمت آج بھی متحد ہے۔ لبنان اور فلسطین میں مزاحمت پہلے سے زیادہ مضبوط ہو رہی ہے۔ جدوجہد جاری رہے گی اور مقدسات و سرزمین کے دفاع کے عزم میں کوئی کمزوری نہیں آئے گی۔
انہوں نے آخر میں کہا کہ اگرچہ یہ عظیم قربانی دلوں میں گہرا غم چھوڑ گئی ہے، مگر یہی خون مزید عزم اور حوصلہ دیتا ہے تاکہ جدوجہد کو پہلے سے زیادہ مضبوطی کے ساتھ جاری رکھا جا سکے۔