اسرائیل نے 2023 سے ریڈ کراس کی فلسطینی اسیران تک رسائی روک رکھی ہے

ریڈ کراس کی بین الاقوامی کمیٹی کے ڈائریکٹر جنرل پیئر کرینبول نے انکشاف کیا ہے کہ قابض اسرائیل سات اکتوبر سنہ 2023 سے فلسطینی اسیران تک ریڈ کراس کی رسائی مسلسل روکے ہوئے ہے۔

اتوار کے روز جاری اپنے صحافتی بیان میں کرینبول نے بتایا کہ ریڈ کراس کی کمیٹی اسیران تک رسائی کے لیے اپنی کوششوں میں اضافہ کر رہی ہے، حالانکہ قابض اسرائیل نے اس کے کام پر سخت پابندیاں عائد کر رکھی ہیں۔

اس سلسلے میں ایک اسرائیلی رپورٹ نے بھی پردہ چاک کیا ہے کہ فلسطینی اسیران غزہ پر غاصبانہ جنگ کے آغاز کے بعد سے تیزی سے بگڑتی ہوئی اذیت ناک حالات میں قید رکھے جا رہے ہیں۔ رپورٹ کے مطابق متعدد اسیران شدید بھوک کا شکار ہیں۔ یہ تفصیلات اسرائیلی اٹارنی جنرل کے دفتر کی جانب سے جاری کردہ ایک آڈٹ رپورٹ میں سامنے آئیں۔

عبرانی اخبار ٹائمز آف اسرائیل نے اتوار کے روز لکھا کہ آڈٹ میں قیدیوں کے وزن میں خطرناک حد تک کمی اور شدید غذائی قلت کی علامات پائی گئیں جنہیں دفتر کے نمائندوں نے ملاقاتوں کے دوران مشاہدہ کیا۔ رپورٹ کے مطابق معائنہ کاروں نے بتایا کہ کئی اسیران انتہائی حد تک دبلا ہو چکے ہیں۔

رپورٹ میں واضح کیا گیا کہ اسیران کی حالت اس وقت زیادہ تباہ کن ہو گئی جب غزہ پر قابض اسرائیل کی جارحیت کے بعد گرفتار شدگان کی تعداد میں اضافہ ہوا۔ اسیران کو انتہائی کمزور خوراک دی جا رہی ہے اور جیل کے پہرے داروں کی جانب سے بار بار جسمانی تشدد کیا جاتا ہے۔ انہیں ایسے غیر صحت مند ماحول میں رکھا گیا ہے جہاں گنجان سیلوں میں بیماریاں تیزی سے پھیل رہی ہیں۔

قابض اسرائیل کی جیل انتظامیہ نے جنگ شروع ہونے کے بعد معمول کی سرگرمیوں پر سخت پابندیاں عائد کر دیں۔ فلسطینی اسیران کو اپنے اہل خانہ سے رابطے، ریڈ کراس سے ملاقات اور روزانہ سیل سے صرف ایک گھنٹہ باہر نکلنے تک سے محروم کر دیا گیا ہے۔ اس کے علاوہ انہیں اپنی ذاتی اشیاء رکھنے کے حق سے بھی محروم کر دیا گیا ہے جن میں کتابیں اور خاندانی تصاویر شامل ہیں۔

یہ سخت پابندیاں تمام فلسطینی اسیران پر لاگو کی گئی ہیں جن میں کم عمر اسیر بھی شامل ہیں اور ان کے حالات، صحت اور انسانی ضرورتوں کا کوئی خیال نہیں رکھا جا رہا۔