اسلام247 : ایشیاکپ 2025 کے فائنل میں کل پاکستان اور بھارت کی ٹیمیں پہلی بار ایک دوسرے کے مد مقابل ہوں گی، تاہم دونوں ممالک کے درمیان جاری کشیدہ تعلقات کے باعث روایتی فوٹوشوٹ نہ کروائے جانے کا امکان ہے۔
متحدہ عرب امارات میں جاری ایشیاکپ کے آخری معرکے میں پاکستان اور بھارت کی ٹیمیں پہلی بار فائنل میں مدمقابل ہوں گی۔ آئی سی سی کے کسی بھی ایونٹ کے فائنل سے قبل دونوں کپتان ٹرافی کے ساتھ تصاویر بنواتے ہیں، لیکن پاکستان اور بھارت کے کشیدہ تعلقات کی وجہ سے کپتانوں کا روایتی فوٹو شوٹ ممکنہ طور پر نہیں ہو پائے گا۔ عام طور پر یہ فوٹو شوٹ فائنل سے ایک دن قبل کروایا جاتا ہے، تاہم ٹورنامنٹ کے منتظمین نے کہا ہے کہ آج ایسا کوئی ایونٹ نہیں ہے اور کل میچ سے قبل حتمی فیصلہ کیا جائے گا۔
خیال رہے کہ 14 ستمبر کو دبئی میں کھیلے جانے والے پاک-بھارت میچ کے بعد بھارتی کپتان سوریا کمار یادو نے نہ صرف پاکستانی کھلاڑیوں سے ہاتھ ملانے سے انکار کیا بلکہ پوسٹ میچ پریزنٹیشن اور پریس کانفرنس میں سیاسی بیان بھی دیا تھا، جس پر پاکستان کرکٹ بورڈ نے آئی سی سی سے شکایت کی تھی۔ بعد ازاں آئی سی سی نے سوریا کمار یادو اور پاکستانی پیسر حارث رؤف پر میچ فیس کا 30 فیصد جرمانہ عائد کیا اور صاحبزادہ فرحان کو وارننگ دی گئی۔
ایشیاکپ 2025 میں بھارت اب تک ناقابل شکست رہی ہے اور گروپ مرحلے سمیت سپر فور مرحلے میں تمام میچز جیت چکی ہے۔ پاکستان کو گروپ مرحلے میں بھارت سے شکست ہوئی تاہم دیگر میچز میں کامیابی حاصل کی اور سپر فور میں سری لنکا اور بنگلہ دیش کو شکست دے کر فائنل میں پہنچا۔
تاریخ میں یہ پہلا موقع ہے کہ کسی بھی آئی سی سی ایونٹ میں پاکستان اور بھارت نہ صرف تیسری بار مدمقابل ہیں بلکہ ایشیاکپ کی تاریخ میں پہلی بار 17ویں ٹورنامنٹ کے فائنل میں ایک دوسرے کے سامنے ہوں گے۔
پاکستان کے خلاف بھارتی کھلاڑیوں میں بیٹنگ میں ابھیشیک شرما اور شبمن گل جبکہ باؤلنگ میں جسپریت بمراہ اور کلدیب یادو سرفہرست ہیں۔ ابھیشیک شرما نے پاکستان کے خلاف دو میچز میں 105 رنز بنائے، شبمن گل نے چھ میچز میں کارکردگی دکھائی۔ باؤلنگ میں کلدیب یادو نے نو میچز میں 19 وکٹیں حاصل کیں اور جسپریت بمراہ نے 14 میچز میں 14 کھلاڑی آوٹ کیے۔
پاکستان کرکٹ ٹیم کے کپتان سلمان علی آغا آج رات 7 بجے پاکستانی وقت کے مطابق پریس کانفرنس کریں گے۔