اسلام247 : جعفر ایکسپریس حملے کا ماسٹر مائنڈ اور فتنہ الہندوستان کا دہشت گرد افغانستان میں ہلاک
کالعدم بلوچستان لبریشن آرمی (بی ایل اے) کی ذیلی دہشت گرد تنظیم مجید بریگیڈ کا کمانڈر اور جعفر ایکسپریس حملے کا ماسٹر مائنڈ افغانستان میں ہلاک ہوگیا۔ فتنہ الہندوستان کا دہشت گرد گل رحمٰن عرف استاد مرید افغانستان کے صوبہ ہلمند میں پراسرار طور پر مارا گیا۔ بھارتی میڈیا کے مطابق دہشت گرد 17 ستمبر کو ہلاک ہوا۔
ذرائع کا کہنا ہے کہ گل رحمٰن کی افغان سرزمین دہشت گردی کے لیے استعمال ہونے کا ایک اور ثبوت ہے۔ دہشت گرد گل رحمٰن پاکستان میں دہشت گردی کی کئی کارروائیوں میں ملوث رہا ہے
یہ بھی پڑھیں: دہشت گردی اور علیحدگی پسندی پوری ایس سی او کیلیے خطرہ ہے، وزیراعظم
ذرائع کے مطابق دہشت گرد گل رحمٰن فتنہ الہندوستان (مجید بریگیڈ) کا ٹرینر اور آپریشنل کمانڈر تھا۔ وہ پاکستانی سیکیورٹی فورسز، چینی شہریوں، معصوم عوام اور مختلف اداروں پر حملوں میں ملوث رہا۔
فتنہ الہندوستان نے پاکستان کے نہتے معصوم شہریوں، سیکیورٹی فورسز اور سی پیک منصوبوں کو نشانہ بنایا۔ اس تنظیم نے جعفر ایکسپریس، کراچی میں چینی قونصلیٹ اور گوادر کے پرل کانٹینینٹل (پی سی) ہوٹل پر دہشت گرد حملے کیے۔
اسی طرح فتنہ الہندوستان خضدار اسکول بس دھماکے، کراچی میں کنفیوشس انسٹی ٹیوٹ خودکش حملے، پاکستان اسٹاک ایکسچینج پر حملے اور کوئٹہ ریلوے اسٹیشن میں دہشت گردی کی کارروائیوں میں بھی ملوث رہی ہے۔
امریکا پہلے ہی فتنہ الہندوستان کے مجید بریگیڈ کو عالمی دہشت گرد تنظیم قرار دے چکا ہے جبکہ پاکستان اور چین نے اس گروپ کو اقوام متحدہ کی دہشت گرد فہرست میں شامل کرنے کا مطالبہ کر رکھا ہے۔
ذرائع کے مطابق فتنہ الہندوستان کے دہشت گرد کی ہلاکت اس بات کا ثبوت ہے کہ افغان سرزمین پاکستان میں دہشت گردی کے لیے استعمال ہو رہی ہے۔