اسلام247:پاکستان نے ایشیا کپ کے بقیہ میچز کھیلنے کے لیے شرط رکھ دی ہے کہ اگر میچ ریفری اینڈی پائیکرافٹ کو فوری طور پر نہیں ہٹایا گیا تو قومی ٹیم مزید کوئی میچ نہیں کھیلے گی۔
پی سی بی اور ایشین کرکٹ کونسل کے چیئرمین محسن نقوی نے سماجی رابطے کی ویب سائٹ ’ایکس‘ پر ٹوئٹ میں کہا کہ پی سی بی نے آئی سی سی میں باضابطہ شکایت درج کرائی ہے۔
محسن نقوی نے بتایا کہ میچ ریفری نے آئی سی سی کے ضابطہ اخلاق اور ایم سی سی قوانین کی خلاف ورزی کی ہے، اس لیے ان کی ایشیا کپ سے فوری برطرفی ضروری ہے۔
بھارتی ٹیم کے رویے پر اعتراض
ذرائع کے مطابق ایشین کرکٹ کونسل کی جانب سے بھارتی ٹیم پر جرمانہ عائد ہونے کا امکان ہے۔
گزشتہ روز پاکستان کو شکست دینے کے بعد بھارتی ٹیم نے اسپورٹس مین اسپرٹ کی خلاف ورزی کرتے ہوئے پاکستانی کھلاڑیوں سے مصافحہ نہیں کیا۔
ترجمان پاکستان ٹیم کے مطابق ٹاس کے وقت بھی میچ ریفری نے کپتانوں کو ہاتھ نہ ملانے کا مشورہ دیا تھا۔
پاکستانی کپتان سلمان علی آغا نے اسی رویے کے خلاف اختتامی تقریب میں شرکت سے انکار کیا۔
سوریا کمار یادیو کا متنازع بیان
بھارتی کپتان سوریا کمار یادیو نے جیت کے بعد پریزنٹیشن تقریب میں کھیل کو سیاست سے جوڑتے ہوئے کہا:
“آج کی جیت کو پہلگام واقعے کے نام کرتا ہوں، یہ بھارت کی فوج کے لیے تحفہ ہے۔”
پاکستان نے اس بیان کو کرکٹ قوانین اور اسپرٹ کے منافی قرار دیا ہے۔