حکومتِ پنجاب کی جانب سے حالیہ مہنگے سرکاری طیارے کی خریداری کے بعد اب کابینہ اور وی آئی پیز کے لیے کروڑوں روپے مالیت کی نئی گاڑیاں خریدنے کی تجویز سامنے آ گئی ہے، جس پر سیاسی حلقوں میں بحث چھڑ گئی ہے۔
میڈیا میں شائع اعظم ملک کی رپورٹ کے مطابق پنجاب حکومت کے ٹرانسپورٹ ونگ نے کابینہ کے لیے 30 کروڑ روپے کی لاگت سے 28 نئی گاڑیاں خریدنے کی سفارش کی ہے۔ ان میں دو وزرا کے لیے تقریباً 4 کروڑ روپے مالیت کی دو بلٹ پروف گاڑیاں بھی شامل ہیں۔ ذرائع کے مطابق بلٹ پروف گاڑیوں کی خریداری کی اجازت پہلے ہی دی جا چکی ہے، جبکہ وی آئی پیز کے لیے 27 کروڑ روپے مالیت کی 25 گاڑیوں کی منظوری بھی دی جا چکی ہے۔
اسی طرح چیف منسٹر انسپکشن ٹیم کے لیے بھی 53 کروڑ روپے کی گاڑیاں خریدنے کی تجویز دی گئی ہے، جن میں موٹر سائیکلیں بھی شامل ہوں گی۔ حکام کا کہنا ہے کہ کابینہ سے حتمی منظوری کے بعد خریداری کا عمل شروع کیا جائے گا۔
یاد رہے کہ حکومتِ پنجاب نے گزشتہ برس تقریباً 10 ارب روپے مالیت کا ایک جدید سرکاری طیارہ خریدا تھا، جس پر بھی اخراجات کے حوالے سے تنقید سامنے آئی تھی۔ یہ خبر دیگر قومی میڈیا اداروں میں بھی رپورٹ کی گئی ہے۔