اقوام متحدہ میں ایران کے مستقل مندوب نے سلامتی کونسل سے اپنے خطاب میں کہا ہے کہ غاصب اسرائیلی حکومت غاصبانہ قبضے کو یقینی بنانے اور شام کے حصے بخرے کرنے کے درپے ہے۔
اقوام متحدہ میں اسلامی جمہوریہ ایران کے مستقل مندوب امیر سعید ایروانی نے شام کے بارے میں منعقدہ سلامتی کونسل کے خصوصی اجلاس سے اپنے خطاب میں”بیت جن”علاقے پر اسرائيل کے جارحانہ حملوں کی مذمت کرتے ہوئے کہا کہ غاصب اسرائیلی حکومت دانستہ طور پر شام کے مختلف علاقوں پر اپنے غاصبانہ قبضے کو حتمی شکل دے رہی ہے اور شام کو کمزور کرکے اس کے حصے بخرے کرنا چاہتی ہے۔
امیر سعید ایروانی نے الجزائر، ڈینمارک اور سلووینیا کی کوششوں سے سلامتی کونسل کے ارکان کے شام اور لبنان کے دورے کو خوش آئند قرار دیا اور امید ظاہر کی کہ یہ دورہ صیہونی حکومت کے غاصبانہ اقدامات اور دیگر غیرقانونی حرکتوں کو روکنے میں مؤثر ثابت ہوگا۔
انہوں نے شام کے سویدا علاقے میں عام شہریوں کو نشانہ بنانے کی جانب اشارہ کرتے ہوئے کہا کہ ان وحشیانہ جرائم کا ارتکاب کرنے والوں کو سزا دینا اور مستقبل میں ایسے واقعات کی روک تھام کے لیے ضروری ہے کہ دمشق میں موجود عارضی حکومت ٹھوس فیصلہ کرے اور مذہبی اور سماجی اختلافات میں شدت پیدا نہ ہونے دے۔