تحریک لبیک پاکستان کے مظاہرے، دھرنے اور پُرتشدد احتجاجوں کے دوران پولیس کا بھاری نقصان کا سامنا کرنا پڑا۔
تحریک لبیک پاکستان کے پُرتشدد مظاہروں میں 2016 سے 2025 تک پولیس کے کتنے ملازمین شہید و زخمی ہوئے۔ کتنی گاڑیاں جلائی اور ناکارہ بنائی گئیں، تمام تفصیلات سامنے آگئیں۔
پولیس ریکارڈ کے مطابق تحریک لبیک کے پُرتشدد مظاہرین نے لاہور سمیت پنجاب بھر میں 11 پولیس ملازمین کو شہید کیا۔ بے قابو ہجوم کے پتھراؤ، ڈنڈوں اور فائرنگ سے 16 سو 48 ملازمین زخمی ہوئے۔
پولیس ریکارڈ کے مطابق زخمی ہونیوالے 69 ملازمین مستقل معذور ہوگئے۔ 202 شدید زخمی جبکہ11 سو 94 زخمی ہوئے۔ پُرتشدد مظاہرین کے تشدد سے 16 عام شہری جاں بحق جبکہ 54 شدید زخمی ہوئے۔
پولیس حکام نے مزید بتایا کہ97 گاڑیاں مکمل طور توڑ پھوڑ کرکے ناکارہ بنا دی گئیں جبکہ 20 گاڑیاں جلا دی گئیں۔ پولیس کی 10عمارتوں کو شدید نقصان پہنچایا گیا۔
تحریک لبیک کے پُرتشدد مظاہرین پر 305 مقدمات دہشت گردی دفعات کے تحت درج ہوئے جبکہ 480 دیگر دفعات کے تحت ایف آئی آرز درج کی گئیں۔
پولیس حکام کے مطابق حالیہ مقدمات میں 1529 نامزد جبکہ 17 ہزار 812 نامعلوم ملزمان کیخلاف مقدمات درج ہوئے۔