اسلام247 : صدر مسعود پزشکیان — ایران و روس کا تعاون یک قطبی دنیا کے خاتمے کی علامت
ایرانی صدر مسعود پزشکیان نے کہا ہے کہ ایران اور روس جیسے خودمختار ممالک کے درمیان کامیاب تعاون سے یہ بات واضح ہوتی ہے کہ دنیا میں یک قطبی دور کا خاتمہ ہوچکا ہے۔
تہران میں روس کے وزیر توانائی سرگئی تسویلیف سے ملاقات کے دوران صدر پزشکیان نے زور دیا کہ خودمختار ریاستیں ترقی اور خوشحالی کے لیے عالمی طاقتوں پر انحصار کیے بغیر آگے بڑھ سکتی ہیں۔
صدر نے دونوں ممالک کے جاری تعاون پر اطمینان کا اظہار کرتے ہوئے کہا کہ فریقین دوطرفہ معاہدوں کے نفاذ، خاص طور پر نقل و حمل، توانائی اور بجلی کی پیداوار کے شعبوں میں تیزی لانے کے لیے پرعزم ہیں۔ انہوں نے وزراء اور تکنیکی ٹیموں پر زور دیا کہ ماہرین کی میٹنگز میں ہونے والے فیصلوں کو فوری عملی شکل دی جائے۔
صدر پزشکیان نے مزید کہا کہ دوطرفہ سفارتی تبادلے دوستانہ تعلقات کو مزید فروغ دیں گے۔
ملاقات کے دوران روسی وزیر توانائی سرگئی تسویلیف نے کہا کہ اعلیٰ حکام کی کوششوں کی بدولت ایران-روس مشترکہ اقتصادی کمیشن کے تحت تعاون میں نمایاں اضافہ ہوا ہے۔ انہوں نے صدر پزشکیان کی کاوشوں کا شکریہ ادا کیا اور یقین دلایا کہ روس معاہدوں کے نفاذ میں تیزی لانے کے لیے تیار ہے۔