اسلام247 : ایران میں موساد کے لیے جاسوسی کرنے والے بابک شہبازی کو تختہ دار پر لٹکا دیا گیا
ایرانی عدالت کی جانب سے جاری بیان کے مطابق، بدنام زمانہ صہیونی انٹیلی جنس ایجنسی موساد کے ساتھ معلومات کے تبادلے، جاسوسی اور سکیورٹی تعاون میں ملوث بابک شہبازی کو تمام قانونی مراحل طے کرنے اور دیوان عالی کی طرف سے فیصلے کی توثیق کے بعد آج صبح سزائے موت پر عمل درآمد کے تحت تختہ دار پر لٹکا دیا گیا۔
تفصیلات کے مطابق، بابک شہبازی فرزندِ رحم خدا صنعتی کولنگ سسٹمز کی ڈیزائننگ اور تنصیب میں ماہر تھا اور بطور ٹھیکیدار مختلف ٹیلی کمیونیکیشن، فوجی اور سلامتی کے اداروں سے وابستہ کمپنیوں کے ساتھ کام کرتا تھا۔
وہ 2021-22 میں ایک آن لائن گروپ کے ذریعے اسماعیل فکری سے ملا، جس کے ساتھ مل کر اس نے حساس مراکز میں جاسوسی کے منصوبے تیار کیے اور موساد کو فروخت کرنے کے لیے متعدد اقدامات کیے۔ شہبازی کو ٹیلی کمیونیکیشن، فوجی اور سلامتی کے حساس انفراسٹرکچر تک رسائی حاصل تھی، اور اس نے موساد کے ساتھ کئی اسکائپ میٹنگز اور ہفتہ وار رابطوں کے ذریعے اہم معلومات فراہم کیں۔
ملزم نے موساد سے پیسوں اور کسی غیر ملکی ملک میں اقامت کے بدلے معلومات فراہم کرنے کا اعتراف کیا۔ عدالت میں مقدمہ قانونی ضوابط کے مطابق اور ملزم کے وکیل کی موجودگی میں سنا گیا، جس کے نتیجے میں اسے روئے زمین پر فساد پھیلانے اور دشمن ملک کے ساتھ تعاون کے جرم میں سزائے موت سنائی گئی۔ اعلیٰ عدالت نے اپیل مسترد کرتے ہوئے فیصلے کی توثیق کی، اور 17 ستمبر 2025 کی صبح پھانسی پر عمل درآمد کیا گیا۔