انسداد دہشتگردی عدالت (اے ٹی سی) نے رہنما پاکستان تحریک انصاف (پی ٹی آئی) یاسمین راشد کی 9 مئی کیس میں ضمانت منظور کر دی۔
انسداد دہشتگردی عدالت کے جج منظر علی گل نے ضمانت کی درخواست پر فیصلہ سنایا، پی ٹی آئی رہنما کی 9 مئی کے ایک مقدمے میں ضمانت منظور کی گئی۔
عدالت نے مغلپورہ میں پولیس گاڑیاں جلانے کے مقدمے میں ضمانت منظور کی اور یاسمین راشد کو 1 لاکھ کے ضمانتی مچلکے جمع کروانے کا حکم دیا۔
اے ٹی سی نے کہا کہ لاہور ہائیکورٹ کے فیصلے کی بنیاد پر ضمانت منظور کی ہے، عدالت عالیہ نے اعجاز چوہدری کی ضمانت منظور کی جبکہ عمر سرفراز چیمہ کی اس مقدمے میں ضمانت بھی اسی بنیاد پر منظور کی۔
یاسمین راشد کی دیگر 3 مقدمات میں ضمانتوں پر سماعت 25 نومبر تک ملتوی کر دی گئی۔ واضح رہے کہ عسکری ٹاور اور جناح ہاؤس کے قریب پولیس گاڑیاں جلانے کے کیسز میں درخواستیں دائر ہیں۔
واضح رہے کہ ستمبر میں انسداد دہشتگردی عدالت نے 9 مئی کیس میں یاسمین راشد، اعجاز چوہدری، محمود الرشید، سرفراز چیمہ کو 10، 10 سال قید کی سزا سنائی تھی۔
عدالت نے 9 مئی کو سپریم کورٹ ججج کے اسکواڈ کی گاڑی جلانے کے مقدمے کا فیصلہ سنایا تھا جس میں سابق وزیر خارجہ شاہ محمود قریشی کو بری کر دیا گیا تھا۔
اے ٹی سی نے خدیجہ شاہ کو 5 سال قید کی سزا سنائی تھی جبکہ روبینہ جمیل اور افشاں طارق کو مقدمے سے بری کر دیا تھا۔
لاہور میں تھانہ سرور روڈ میں درج مقدمہ نمبر 109/23 میں کل 51 ملزمان کا چالان پیش کیا گیا اور عدالت نے مجموعی طور پر 39 ملزمان کا ٹرائل مکمل کیا۔
مقدمے میں نامزد 12 ملزمان کو اشتہاری قرار دیا جا چکا ہے، مقدمے میں مجموعی طور پر 5 خواتین ملزمان بھی شامل ہیں۔